Tapos… The End.. Kadalasan, kapag sinabi nating katapusan, iniisip natin na iyon na ang dulo. Halimbawa na lang ay ang graduation. Pag sinabi nating nakapagtapos na tayo ng pag-aaral, madalas, hanggang doon na lang iyon. Karamihan sa atin, nasasayahan dahil sa wakas, maaari na natin gawin ang mga hindi pa natin nagagawa noong nag-aaral pa tayo. Ngunit, hindi ito ang itinuturo ng disiplina sa disyerto. Kung maalala natin, matapos sagipin ni Moses ang mga Israelita sa mga Paraoh, inisip ng mga Israelita na yun na ang katapusan ng kanilang pagkaalipin sa mga Paraoh. Sa kabilang banda, ang iba sa kanila ay nag-alinlangan pa rin at bumalik sa dati nilang gawi kaya’t dinala sila ni Moses sa disyerto. Gayunpaman, ang mga Israelita ay sumamba pa rin sa mga diyos-diyosang ginto ngunit sa diyerto din sila naliwanagan na sila mismo ay salawahan at mga sakim. Sa loob ng apat-napung taon, ang disyerto ang naghanda sa kanila upang sila ay makapasok sa lupang pangako. Sa Pilipinas, ang EDSA 1 ang animo’y kahalintulad na karanasan ng pagtawid natin tungo sa kalayaan. Matatandaang dahil sa sama-samang pagkilos ng sambayanan, nagapi ang mapang-aping diktadura ng Martial Law. Ngunit, ano na ang nangyari matapos noon? Hindi ba’t parang naging pabaya tayo sa ating kalayaan sa puntong nagamit ito upang unti-unti tayong lumubog sa kahirapan? Tinuturo sa atin ng disiplina sa disyerto na huwag magwalang-bahala… na ang katapusan ay umpisa lamang ng panibagong hamon… ang hamong panatilihin kung hindi man paghusayan sa susunod na tagpo. Araw-araw, tayo ay dumadaan sa mga disyertong susubok sa atin. Ngunit, ang mga disyertong ito rin mismo ang magtuturo at huhulma sa ating pagkatao. Gaano na kaya tayo natuto sa disyertong kinaroroonan natin ngayon? Malalaman natin sa darating na eleksyon. TEXT CAMPAIGN: Natuto na nga ba tayo? Malalaman natin sa darating na eleksyon… (para sa karagdagang impormasyon, bisitahin ang http://ppcrvsanvicentedepaul.weebly.com) 
0 Comments
Leave a Reply. | |||
RSS Feed
