Pare-pareho nalang ba ang mga ginagawa mo sa bawat araw? Gumigising, pumapasok sa trabaho o paaralan, umuuwi ng bahay, natutulog… Sa susunod na araw, gigising ka na naman, papasok sa trabaho o paaralan, uuwi ng bahay at matutulog? Hindi ka pa ba nagsasawa sa paulit-ulit na gawain? Ayaw mo bang mabago man lang ginagawa mo? Ayaw mo bang maging kakaiba? Bawat araw, binibigyan tayo ng pagkakataong magpasya at gumawa ng pagbabago. Ikaw, anong pagbabago na ang nagawa mo sa sarili mo? Sa kapwa mo? Sa bayan? Ngayon, bibigyan ka namin ng pagkakataong magpasya at gumawa ng pagbabago. Sagutin lamang ang tanong na ito: Sapat na ba sa iyo ang bumoto lang? Kung oo ang sagot mo, balewalain mo na lamang ang paanyayang ito. Ngunit kung ang sagot mo ay hindi… hindi sapat na bumoto lang, ikaw ay inaanyayahan naming makisangkot sa Parish Pastoral Council for Responsible Voting o PPCRV. Maraming paraan upang maging kasapi. Maaaring maging Active Volunteer, Text Volunteer at Financial Partner. Ang Active Volunteer ay ang magiging katuwang ng PPCRV sa aktwal na pagsasagawa ng mga proyekto gaya ng Voters’ Education, Complete Voters’ List Cleansing, Pollwatching at iba pa. Ang Text Volunteer naman ay hindi kinakailangang maging aktibong kasapi ng PPCRV. Papadalhan ang mga text volunteer ng mga text messages sa bawat linggo at tungkulin nila ay ipadala lamang ito sa lahat ng mga kakilala nila gamit ang unlimited texting. Ang mga Financial Partners naman ay maaaring magbahagi ng kanilang mga pledges o mga donasyon upang makatulong sa mga aktibidad ng PPCRV. Ngayon, magpasya ka. Patuloy ka pa rin ba sa pagiging pangkaraniwan o gusto mong maging kakaiba… Maging bahagi ng pagbabago… Para sa iba pang impormasyon, magpunta lamang sa mga volunteers na nasa labas ng simbahan. 
0 Comments
Naisip mo ba na ikaw mismo? Na ikaw ang gagawa? Na responsibilidad mo?
Sa simula diba parang ang hirap umako ng gawain o responsibilidad? Lalo na kung ito ay makabago o para sa kinabukasan? Pero bawat isang tao ay may nakatakdang gawain o responsibilidad maliit man ito o malaki. Bata man o matanda may responsibilidad na parte sa pagbabago para sa kinabukasan. Responsable ka ba? Kung hindi, maaring ikaw ay isa ka sa mga taong sumusunod: Taong Diktador, Taong Otosan at Taong Asaka? Ang Taong Diktador ay ang taong utos lang ng utos. Yung walang magagawa kapag walang mapag-uutusan. Yung tipong palaging nag-uutos na dapat ganito o dapat ganyan sa mga gawaing pang-grupo. Sa madaling salita, sila yung palaging nagmamando at wala nang ibang makakakwestiyon sa utos niya. Masasabing hindi sila ganap na responsable dahil maaaring sila ang nakaisip ng solusyon ngunit hindi mismo sila ang gumagawa ng aksyon para dito. Ang sumunod na uri ng taong hindi responsable ay ang Taong Otosan na gagawa lang kapag napagutusan. Kung sa isang pang-grupong Gawain, sila yung masasabi nating “Loyalista” na gagawin lang kung ano ang pinagagawa sa kanya… kung minsan, kahit labag ito sa kanyang kalooban. Hindi sila ganap na responsable dahil hindi sila nagkukusang umisip ng solusyon bagama’t sila ang gumagawa ng aksyon. Ang pangatlong uri ng taong hindi ganap na responsable ay ang Taong Asaka. Sila ang mga taong pabaya o umaasa na lamang sa iba upang may magawa. Yung tipong “supporter” lamang sa mga pang-grupong gawain. Yung sumusuporta lamang sa mga napagdesisyunan ng nakararami para masabi lang na may nagawa. Masasabing hindi sila responsable dahil bukod sa hindi sila nag-iisip ng solusyon ay maaari ring hindi sila ang nagkukusang umaksyon. Nakadepende ang kanilang pag-iisip at pagkilos sa pag-iisip at pagkilos ng iba. Ang pagiging responsable ay hindi lang sa isip. Ito din dapat ay nakikita sa gawa. Ikaw? Responsable ka ba? Baka naman isa ka sa mga taong nabanggit? Isa ka bang Diktador na lagi nalang nag-uutos? Isang Otosan na taga-sunod na lamang s autos? O Isang Supporter na umaasa na lamang sa iba? Maging sino ka man? May pagpapabago pa ang bukas, hindi man ngayon ngunit simulan ngayon para sa kinabukasan. Maging Responsable… Ikaw mismo… Kung responsible ka, ano mismo ang pwede mong magawa? Ba’t di ka maging bahagi ng PPCRV para ikaw mismo ay bahagi ng pagbabago. TEXT CAMPAIGN: Ako Mismo ay isang PPCRV… isang tagapagpabago. Ikaw? Gusto mo makapagpabago? Mag-PPCRV. | |||
RSS Feed
